السيدة رباب الصدر في "حكايتي مع الإمام": لم نفقد الأمل يومًا، وأملنا بالله سبحانه وتعالى أن يُفرِّج عنهم.

حلَّت السيدة رباب الصدر ضيفة على برنامج "حكايتي مع الامام" الذي تعده وتقدمه الاعلامية نسرين نجم عبر اثير اذاعة الرسالة. وقد تطرقت الحلقة الى ذكريات السيدة رباب الصدر عن الامام موسى الصدر ومواقفه ونشاطاته وقضية تغييبه.

نسرين نجم: السلام عليكم مستمعينا الاحبة، مستمعي اذاعة الرسالة، ورحمة الله وبركاته. من قال ان وهجنا خبا ولم نزل نحمل الرايات، من قال ان صبحنا غفا و النور من فكرنا حروف لامعات. نحن ثبات في الارض، وانحناؤنا في الله كلمات، فينا ليوث الساح نطلب الموت لا نهاب، فينا آيات بينات الصدر فينا للحق كتاب، تتكئ الشمس على جبالنا ونمسك النجم والسحاب، نتلو في كتاب الصدر كيف الحياة وفي اول السطر السيدة رباب. مستمعينا الاحبة يشرفنا في هذه الحلقة من برنامج "حكايتي مع الامام" ان نكون ضيوفًا في رحاب عائلة الامام الصدر مع السيدة الفاضلة رباب الصدر شرف الدين، فأهلًا وسهلًا فيكِ ست رباب ببيتك واذاعتك اذاعة الرسالة.
السيدة رباب الصدر: اهلًا فيكِ، اهلًا فيكِ.

نسرين نجم: بالبدء ست رباب اذا هيك اردنا الرجوع بذكريات الطفولة ماذا تخبرينا عن طفولة سماحة الامام؟ وكيف كانت العلاقة مع الاخوة ومع الوالدين؟
السيدة رباب الصدر: اسمحي لي بالبداية احيي اذاعة الرسالة، هالاذاعة الحلوة المميزة شابة صبية ان شاء الله تكبر وتكبر واحلى كبر ان شاء الله يكون.

نسرين نجم: ان شاء الله، الله يخليكِ.
السيدة رباب الصدر: وتحية لكم جميعًا وخاصة لك اخت نسرين.

نسرين نجم: اهلًا وسهلًا فيكِ.
السيدة رباب الصدر: طبعًا تحية للمستمعين احييهم. ابدأ بالجواب للاسئلة، واقعًا طفولة الامام الصدر انا سامعة من والدتي رحمة الله عليها، لأنه انا في فرق كتير بيني وبينه، يعني بقدر قلّك هو ربّاني مش انا كنت يعني براقب طفولته ولكن حسب ما بسمع والدتي تقول انه بفترة الحمل كانت بتحس يعني مختلف حالتها عن اولادها التانيين. وقت اللي وُلد يمكن يتبادر للذهن لأنه السيد موسى منقول هيك، لأ واقعًا مش هيك، هو كان مميز. هي والدتي بتقول انا كان عندي هيك طقوس خاصة في فترة الحمل كانت تتابع عبادات خاصة. كانت مثلًا تأكل مأكولات خاصة، كانت هي رغبانة انه تمشي يعني نمط مختلف سبحان الله ليش هي احساسها يعني...

نسرين نجم: احساس داخلي كان بيراودها دائمًا.
السيدة رباب الصدر: احساس داخلي وهي فعلًا كانت بفترة الحمل بالسيد موسى غير الآخرين. فبالتالي لا بد هالنمط وهالنهج وهالاعمال الخاصة، هالعبادات او المأكولات كله كتير يؤثر على شخصية الولد كتير كتير. فخلق كمان هو مميز مثلًا انا صرت حاكية كم مرة... طفولته، طفل طفل صحيح بيلعب بينط بس كله فهم، كله عقل، كله ذكاء. مثلًا في ايام السيد موسى في واحد يتخيل انه المدارس كيف كانوا، مثلًا يدرس ما شاء الله بلهفة، يجيب علامات عالية. مثلًا الامتحانات..

نسرين نجم: المدرسية...
السيدة رباب الصدر: المدرسية، الصف السادس ابتدائي، عادةً كانوا يعملوها رسمية يعني مثل البكالوريا اليوم هالقد مهمة، مثلًا يُقال انه وقت اللي عمل هالامتحانات كان اصغر ولد بهالقاعة اللي قاعدين 400 تلميذ وتلميذة عم يعملوا امتحانات. اصغر ولد قاعد عم يعمل امتحانات وهو اول واحد خلّص وضهر. ففي الواحد مثلًا يتخيل هيك ...

نسرين نجم: دليل على التفوق وعلى ذكاءه في هيدي الفترة العمرية.
السيدة رباب الصدر: ما شاء الله لفتته على الامور كانت مختلفة، انتباهه للامور كان مختلف، كان كتير يحب الفوتبول، كتير كتير بيحب الفوتبول بس راكز، صحيح ولد ورش بيعمل... مثلًا يحب نوع المأكولات الخاصة بس بكَبَر يعني برواق...

نسرين نجم: بتهذيب..
السيدة رباب الصدر: بتهذيب فعلًا. كل شيء كان عنده الطفولة واللعب والولدنة بس كلها بركوزية. طبعًا وقت اللي كبر صار يعني اله حضور الشاب ويعني فينا نسميه بينظر له نظرة انه هيدا شاب وقادر يكون كل شيء. كانت علاقاته صدقًا مميزة مع اهله يعني مش مجاملة مش مبالغة. يعني مثلًا كان عنده كتير لفتة على شباب العيلة اولاد الاخ واولاد الاخت. انا مثلًا كنت من عمر اولاد اختي واولاد اخوي كان يشتغل علينا مثلًا كان يشجعنا نحفظ القرآن. كل ما نحفظ سورة لنا جائزة شوفي كيف ولدنة..

نسرين نجم: نعم
السيدة رباب الصدر: واحد بيلعب بينط كمان بنفس الوقت..

نسرين نجم: في الها هدف..
السيدة رباب الصدر: في قدرات عند الولد. مثلًا كان يحيي لنا المناسبات الدينية، مثلًا ليلة النصف من شعبان وين ما يكون... يعني مثل ما هون تعرفتم عليه ان ما شاء الله متحرك بضل يفتل لبنان وبيزور الناس ويتفقد الكل، نفس الشيء كان بإيران بالفترات اللي كان بإيران متحرك رايح جايي مسافر بيتصل. بس ليلة النصف من شعبان وين ما يكون يرجع على البيت، يجمع الاولاد يعمل زينة، الليلة نصف شعبان ولادة الامام المهدي المنتظر سلام الله عليه. فمن خلال هالنماذج الصغيرة اللي انا بقلك انه كان في كتير تقرب بين العيلة واله. مثلًا اذا حدا عنده مشكلة بيحكي له بيحلله اياها. اذا حدا مثلًا عنده حاجة بدو بيظبط له اياها. يعني انا مثلًا طفولتي بيقولوا لي انه ما كنت مثل البقية شو ما يقولوا لي اوافق..لأ مش هيك..

نسرين نجم: كان هنالك رفض.
السيدة رباب الصدر: لأ انه لازم اعرف ليش. قولوا لي ليش حتى اوافق. السيد كان دائمًا يحكي معي، او اذا صار مثلًا مشكلة بيني وبين والدتي وما في مجال ان تقنعني اراجع السيد يقنعني ويقنعها..

نسرين نجم: يعني يكون الوسيط...
السيدة رباب الصدر: بالضبط.

نسرين نجم: ما بين الوالدة وما بين حضرتك.
السيدة رباب الصدر: كان في فترة نحن درسنا بالبيت كلنا. نحن البنات لأنه بنات العلماء ما كانوا يضهروا برات البيوت ويدرسوا. كانوا يجوا على البيت معلمات ويدرسونا انا في فترة حبيت مثلًا اتعلم تعليم الازهار، خياطة شغلات اللي خرج اي صبية بنت تتعلمهم. ما وافقت والدتي قالت لي لأ، وحكت مع اخوي الاكبر رحمة الله عليه السيد رضا قال لها لأ ما بيضهروا بناتنا لبرا يتعلموا، لأ. اذا حدا بيجي على البيت ايه، بس تضهر لأ. انا رحت قلت له للسيد موسى قلت له انا وعم ابكي انه شوف شو عم يعملوا فيي انا رغبانة اتعلم كذا كذا وهني... راح حكى مع والدتي واقنعها وحكى مع اخوي كمان، وقال لي من بكرا بتروحي. يعني شوفي بيعطي ثقة... بس شو قال لي؟ قال لي رباب انتِ اول بنت عم تضهري من البيت تتعلمي، كوني نموذج نموذج، وهاي مسؤولية برقبتك. اما يتجري بنات العيلة وراكِ ليتعلموا او رح تحرمي كل الناس. وفعلًا...

نسرين نجم: كنت خير نموذج...
السيدة رباب الصدر: ان شاء الله، ان شاء الله يعني انا لما بلشت بالحي اللي نحنا كنا ساكنين فيه كانوا ساكنين ثلاث علماء مع ابوي... اربع علماء هذا الحي ما لازم حدا يسكنه لأنه هدول..

نسرين نجم: خاص..
السيدة رباب الصدر: خاص لرجال الدين الكبار وساكنيه.. يعني هيك عادات وتقاليد شو بدو يقول الواحد يعني مثل البلاط الملكي..استغفر الله.

نسرين نجم: لا يجوز لأحد ان...
السيدة رباب الصدر: ما بيصير. يعني انا كنت اشوف غيرة و... فكانت هذه الخطوة جعلت بنات هالعلماء اللي نحنا واياهم جيران كلهم اجوا تعلموا وبنات العيلة كمان اجوا تعلموا، وفي منهم انا علمتهم. يعني كنت انا اللي تعلمته جيت علمتهم. طلعنا مجموعات من البنات اللي منعرف نخيط ونصمم موديلات ونطرز بتعرفي كان بهيداك الوقت مهم، يمكن اليوم ما عاد الها اهمية البنت اللي بتخيط او بتطرز يعني هيدي كلها راحت.

نسرين نجم: لأنه صار في اهتمامات اخرى.
السيدة رباب الصدر: هلق الحياة صارت كمبيوتر، بسرعة، بينما التطريز والخياطة والفنون كتير حلوة..

نسرين نجم: كان لها وقع خاص..
السيدة رباب الصدر: وقع خاص.

نسرين نجم: كان لها قيمة كمان كبيرة..
السيدة رباب الصدر: يعني كنا نعمل لوحات، نطرّز نعمل بالخرز وبالشريط وبالورد من احلى ما يكون. نبروزهم ونحطهم، يحس الواحد ان هيدولي انتاجه يعني خاصة بعمر صغير..

نسرين نجم: يتباهى فيهم قدام الناس.
السيدة رباب الصدر: فأشاهد انه السيد له كتير دور بشباب العائلة، بصبايا العائلة مثلًا في ابن اخوي السيد رضا، دكتور كاظم الصدر ابوه ما كان يحب انه يكفي دراسته، لما خلّص الابتدائي قال له خلص بيكفي تتجه هلق نحو الدراسة الدينية الحوزوية وما في داعي انه تكفي دراستك. كمان راح لعند عمه عند السيد موسى، وشكا له. السيد قال له طيب انت هلق ادرس بالبيت اعمل الثانوي بالبيت..

نسرين نجم: نعم.
السيدة رباب الصدر: الله بيفرجها. عمل المتوسط يدرس، يروح يعمل امتحان. كنا ندرس سوا، ندرس مع بعض هو يروح يقدم امتحان الى ان خلّص البكالوريا جابه السيد على لبنان، اجا على لبنان ودخل الجامعة الاميركية هون.

نسرين نجم: تابع تعليمه.
السيدة رباب الصدر: تابع تعليمه وراح على اميركا، وعمل الدكتوراه. انا هالنماذج الصغيرة عم خبرك يمكن طوّلت كتير لأنه قلت لك انه في حكي كتير كتير.. بدو يحكيه الواحد..

نسرين نجم: نعم.. بالعكس نحن منستفيد وتدل فعلًا قديه كان سماحة الإمام وهذا يعني هالعلاقة الطيبة من صغره كان هذه الشخصية المميزة. بس ولكن هناك دائمًا يُحكى لما يُذكر السيد موسى الصدر مع العائلة ترتبط باسم السيدة رباب، يعني ما سر هذه العلاقة؟ وهل كان هنالك ايضًا من نشاطات مشتركة بينكما خاصة عند مجيء سماحة الامام الصدر الى لبنان؟
السيدة رباب الصدر: واقعًا الفترة اللي كنا في ايران مثل ما انا قلت انا في يعني مسافة زمنية، عمر بيني وبين السيد انا كنت صغيرة. السبب يمكن لأنه وقت اللي اجا السيد على لبنان يعني كان له تقريبًا شي سنتين بلبنان، ثلاث سنين. جينا مع والدتي واختي الاكبر مني على لبنان. اختي الاكبر مني كانت مخطوبة للشهيد السيد محمد باقر الصدر اللي هو ابن عمنا، ابن عمنا اللزم يعني اخ ابوي.

نسرين نجم: قرابة.
السيدة رباب الصدر: قرابة. نحن جينا على لبنان زيارة عند السيد، وبنفس الوقت بدو يتم زواج اختي من السيد محمد باقر الصدر. الفترة التي نحنا كنا هنا سبحان الله صار نصيب، وانا تزوجت كمان من حسين شرف الدين..

نسرين نجم: السيد حسين شرف الدين..
السيدة رباب الصدر: حفيده للامام السيد عبد الحسين شرف الدين، وبقيت بلبنان. بقائي في لبنان اكيد يعني انا ما بقدر ان اقضي الوقت هيك فراغ، يعني شغل البيت بكم ساعة بيخلص، ولا يمكن انه انا روح على زيارات واسواق وضهرات يعني ما بحس انه هيدا ارضاء لي، فعلًا هيك كنت اشعر بهيديك الايام كان عمري 15 سنة. لكن ما كنت احس انه الضهرات اليومية بتسليني. فالسيد كان مبلش بالنشاط النسائي بوقتها كان جمعية البر والاحسان. فكان عامل لجان وترتيبات معينة مع الشباب، وعنده لجنة نسائية، فطلب انه انا اشتغل معهم وفتحوا مؤسسة تحت اسم بيت الفتاة. يعني كل شيء تعليمي ومهن ومهارات بهالمركز ويعلموها للفتاة. فأنا كان الي الشرف انه اشتغل بهذا المكان. وانا بحب هذا الشغل سبحان الله اخذتها بكل جدية، بكل جدية، واشتغلت وكتير كان السيد مبسوط مني. يعني رغم هالشغل الصغير كان منتج، كتير من البنات تعلموا. يعني الفترة الاولى كنا نعلم خياطة واشغال، بعد شوي صرنا نعلم تدبير منزلي، بعد شوي صرنا نعلم اسعافات اولية بعد فترة صرنا نعلم مكافحة الامية. يعني تصوري من قسم المكافحة الامية تخرجوا بنتين، كفوا دراستهم بمدارس واحدة طلعت مهندسة ميكانيك وواحدة طلعت انه ادب عربي وشعر وجمال...

نسرين نجم: وصلت يمكن الى مركز مهم.
السيدة رباب الصدر: يعني تصوري من هذا القسم كانوا يتخرجوا هيك فأنا من هيديك الوقت بقدر اقول لك من 63، من 63 انا وعم بشتغل يعني هلق عم كبّر حالي..

نسرين نجم: لأ... كلك شباب وحيوية ما شاء الله.
السيدة رباب الصدر: بس فعلًا من هيداك الوقت وانا بجانب السيد، وكان الله منعم عليّ انه هو يوجهني، هو يعطيني ملاحظات، هو يدربني دائمًا يسأل طريقة الشغل، دائمًا انا اسأل، دائمًا أعطيه تقارير، دائمًا يصحح لي. فهالمتابعة معه بكل الامور يمكن هيدي جعلت انه دائمًا يذكروني. خاصة يعني ما بيسوى انا اقول بنفسي ولكن مرات الواحد مضطر يقول، كان مبسوط كتير بشغلي انا، وكان دائمًا يخبر الكل. يعني مثلًا كانوا يسألوه اسئلة محاضرات، جمعة كبيرة مثلًا الست المحجبة ما بتقدر تشتغل، بتعرفي بالستينات غير اليوم. يعني نحن اليوم..

نسرين نجم: كان في قيود اكثر ببعض القيم والعادات التي ما لها علاقة حتى بالدين كان..
السيدة رباب الصدر: بالضبط يعني نحن اليوم عايشين الحمد لله بنعيم. الجهود التي بذلوها كبار رجالنا الدين يعني اولهم الامام الصدر، والبقية الله يحميهم ويطول بعمرهم، ويرحم اللي راحوا، كلهم بذلوا جهود الحمد لله نحن اليوم بأحسن حالاتنا... بس بهيداك الوقت ما كان هيك، انه حجاب الفتاة او الست ممكن يكون مانع لتقدمها بالعمل وبالحياة الاجتماعية. دائمًا يعطي نموذج يقول انا اختي رباب محجبة وعندها اولاد، وعندها بيت، وما عندها خادمة، هي بتشتغل بالبيت، وبترعى اولادها وبنفس الوقت بتشتغل وشغلها ناجح جدًا يعني دائمًا كان يأخذ هذا الامر نموذج. يمكن اذا بيذكروني لأني تابعت معه يعني تابعت من اوائل السنين اللي هو اشتغل وانا كنت بجانبه يعني كنت بشاركه وقت اللي يفكر، وقت اللي بخطط وقت اللي بيعطيني تعليمات للتنفيذ، وقت اللي بعطيه تقرير كيف اشتغلنا وقت اللي يصحح الامور، اكيد هيدي لها دور.

نسرين نجم: بالطبع، يعني نحن منأمل دائمًا انه هذا النموذج اللي فعلًا حضرتك قدمتيه ان يحتذي فيه جميع الفتيات وجميع الاخوات بإذن الله سبحانه وتعالى. قبل ما ندخل الى مرحلة مجيء الامام الى لبنان لماذا اختار سماحة الامام اختصاص الاقتصاد؟ وكيف وجدتم صدى دخول يعني اول رجل معمم الى الجامعة في قم طهران؟
السيدة رباب الصدر: في طهران، جامعة طهران نعم، فعلًا. نعم فعلًا هذه الفترة يمكن انا ما كنت خلقانة بعد. بس خبروني مثل ما عم بتقولي اول رجل دين، اول عمامة بتدخل جامعة طهران والسيد ما شاء الله عليه، ما شاء الله قدراته كتير عالية. يعني اختار اصعب شيء اقتصاد وسياسة.

نسرين نجم: الاتنين، ليس فقط الاقتصاد.
السيدة رباب الصدر: ايوه يعني اقتصاد وسياسة، وما شاء الله درس الى جانب الدراسة الحوزوية الدينية التي من المفروض انه يكون رجل دين...

نسرين نجم: يتابع ويكون رجل دين.
السيدة رباب الصدر: وكان ما شاء الله ناجح بالاتنين، لذلك في شغلة تذكرت هلق عادةً رجال الدين يعني اللي بيتعلموا درس الدين مثلًا بيختاروا رجل دين هو استاذهم وبيعطيهم كل الدروس وبيكفوا للآخر. السيد كاين كل مادة بيدرسها عنده استاذ ما شاء الله لأنه احيانًا ما يلاقي جواب اللي هو بدو اياه، بدو ناس هيك يقدروا..

نسرين نجم: يكون عندهم معارف اكثر..
السيدة رباب الصدر: اكثر... في من اساتذته يقولوا بيتعبنا. بيتعب قد ما يسأل اسئلة عميقة، قد ما اسئلة واسعة، يعني بدو واحد يحضر حاله ليقدر يجاوبه فمع هالجهد ما شاء الله نجح بتفوق. وبيتقن اللغات السيد يتقن الانكليزي وفرنسي، اكيد عربي وفارسي، الماني حتى.

نسرين نجم: يعني هو كان محب للعلم لدرجة انه المّ بكافة الموضوعات، يعني لدرجة نحن كنا منلاقيه ولا نزال بالكتابات، بالخطب التي كان يلقيها هو متنوع الاختصاصات وبكل علم هو فعلًا علم بحد ذاته، سماحة الامام الصدر.
السيدة رباب الصدر: في قول للرسول صلى الله عليه وسلم يقول: "كل لسان لإنسان"، هيك فعلًا كان يعتقد، يعتبر انه كل ما بيعرف واحد لغة كل ما بيقدر يكون انسان ثاني، فبيقدر يكون نافع وبيقدر يكون فعال، وبيقدر يعطي اكثر.

نسرين نجم: نعم. يعني هي اللغات تعلم اللغات هي تعرف على عادات وتقاليد واكتساب ثقافة جديدة ايضًا. حضرتك ذكرتِ ببداية الحديث انه كان سماحة الامام عنده هواية الفوتبول، هل ايضًا كان هنالك الى جانب اهتمامه بالعلم وبمتابعة شؤون العائلة والاخوة والاخوات، هل كان ايضًا هنالك هوايات اخرى لسماحة الامام؟
السيدة رباب الصدر: القراءة. قراءة ما شاء الله، ما شاء الله يعني بقدر اقول لك يمكن ما في كتاب مش قاريه، ما شاء الله مخزون من العلم والفكر. اي كتاب يطلع يقرأه مش بس كتب دينية تفكري لا، كتب فكرية ادبية، قصص، سياسة، اي موضوع يطلع كتاب يقرأه ما شاء الله بدو يطّلع بدو يعرف..

نسرين نجم: يعني كان يهوى المعرفة العلم. طيب ماذا عن النرجيلة؟
السيدة رباب الصدر: ايه هيدا... الاركيلة بيحبها لما يجي على البيت يعني لما يكون خلّص نهاره اللي مليان كله تعب ويعني بتعرفي جهد، يجي على البيت ما شاء الله بحدود الساعة 11- 12. الساعة 12 عنده اول الليل وبدو يقعد ونقعد حواليه وبيعمّر الاركيلة وهو يأركل والشاي، يحط منقل النار حدو والشاي ونقعد ويحط اوراقه قدامه.. بيتحدث معنا وبيتشغل بهالاوراق وبيقرأ. انا ما كان فيني اسهر معه انا بطبيعتي ما بسهر يقول لي كل شي فيك منيح..

نسرين نجم: الا السهر..
السيدة رباب الصدر: الا ما بتعرفي تسهري.. بس تصير الساعة 12 ما بقدر اقعد..
نسرين نجم: نعم, على كل ست رباب نحن سنتابع بعد الفاصل حول مجيء سماحة الامام الصدر الى لبنان والعلاقة مع سماحة الامام قدس سره الامام عبد الحسين شرف الدين والسيد محمد باقر الصدر. مستمعينا الاحبة نتوقف لحظات مع فاصل ثم نعود بعدها لمتابعة برنامج "حكايتي مع الامام".

فاصل
نسرين نجم: مستمعينا الاحبة نعود معكم لمتابعة برنامج "حكايتي مع الامام" وفي رحاب الامام الصدر ومع ظل الامام ومع كلمته الصادقة السيدة رباب الصدر شرف الدين. ست رباب نحن حكينا قبل الفاصل عن موضوع طفولة سماحة الامام ودخوله الى الجامعة. اذا اردنا الحديث اكثر عن المرحلة التي اتى بها الى لبنان ماذا وجد سماحة الامام السيد عبد الحسين شرف الدين قدس سره في شخصية الامام الصدر ليطلب منه ان يحل مكانه في عمله؟ وفي ان يكون ايضًا مرجع في مدينة صور؟
السيدة رباب الصدر: نعم مثل ما عم تتفضلي الامام السيد عبد الحسين شرف الدين قبل وفاته تقريبًا يمكن بسنة، طلب من الامام الصدر كان بوقتها عم يدرس بالنجف، طلب انه بعد وفاته يجي ويستلم محله. انا هنا بدي خبرك وخبّر المستمعين نحن من الاجداد في عننا قرابة نحن وشرف الدين في جدنا الرابع في اخوة اثنين واحد صدر الدين وواحد شرف الدين..

نسرين نجم: نعم.
السيدة رباب الصدر: فنحنا من صدر الدين وهني من شرف الدين. وبعدين منجي والدته للامام السيد عبد الحسين شرف الدين بتكون خالة ابوي يعني اخوات...

نسرين نجم: نعم.
السيدة رباب الصدر: كانوا واحدة اخذت السيد.

نسرين نجم: السيد شرف الدين.
السيدة رباب الصدر: شرف الدين ابوه للامام شرف الدين وواحدة اخذت...

نسرين نجم: صدر الدين.
السيدة رباب الصدر: السيد اسماعيل الصدر الذي هو جدنا. يعني في قرابة بالاساس وكتير كان في حب بينهم. كان كتير في حب واحترام. صحيح كانوا بعاد بس انا دائمًا اسمع من ابوي اسمع بيحكي بأهله، بيحكي بعيلته، يعني انا ما شفت حدا منهم ولكن انا حبيتهم بالشرح والحكي اللي كان يحكيه ابوي، واكيد ضمنهم الامام السيد عبد الحسين شرف الدين. فطلب انه يجي السيد على صور، وفعلًا بعد ما توفى السيد عبد الحسين هيدا كان سنة يمكن الـ59 اظن فإجا على لبنان اجا على صور وبقي في صور. واكيد حوله هالمؤمنين هالطيبين، هالناس المحبين في منهم الآن توفوا رحمة الله عليهم، في منهم بعدهم موجودين، منحسهم كأنهم العيلة كيف كانوا ملتفين حول السيد وحولنا فبدأ السيد بنشاطه بلبنان.

نسرين نجم: ومن هناك انطلق من صور؟
السيدة رباب الصدر: اكيد بعتقد انه صرنا حاكيين مرات انه السيد اشتغل بنهج ما اشتغل هيك عمل عشوائي، كان عنده دراسات، كان عنده اطلاع على كل الامور. يعني عمل دراسة على وضع لبنان ككل، كل الطوائف لأنه لبنان بلد فيها طوائف

نسرين نجم: تنوع.
السيدة رباب الصدر: فمفروض الانسان اللي بدو يعمل يعرف الحالة الموجودة حتى يكون ناجح..

نسرين نجم: كان هناك تخطيط ايضًا..
السيدة رباب الصدر: بالضبط يعني درس وضع الطوائف كلها بما فيها وضع الطائفة الشيعية، مع الاسف يعني بتعرفي دائمًا الطائفة الشيعية طائفة مظلومة بما انهم اكثر للوطن ويضحون اكثر ومستعدون لكل تضحية ولكل خدمة. مع ذلك يمكن في ظروف الله واعلم ليش يمكن قرار الله. فالسيد بدأ بالعمل حسب الدراسات اللي عملها. كان عنده شغل متوازي، بيخدم ويشتغل للكل، وبيركز عمله للشيعة. فبدأ بمدارس، بمؤسسات بمستشفيات، بالتعليم، التوجيه، مثلًا الكثير من الشباب ما كانوا قادرين يدرسوا لمّا خلصوا البكالوريا امّن لهم منح، راحوا مجموعات خارج لبنان بعد فترة رجعوا كلهم دكاترة و مهندسين واساتذة ومدراء ومستوى. مثلًا ما كان في حدا ذا مستوى يعني عندهم مستويات ووظائف في الدولة اشتغل على هذا الامر، اشتغل كتير مع اخواننا المسيحية، كتير اشتغل اكيد سامعة بالندوة اللبنانية اللي كانوا يقولوا... الندوة اللبنانية مؤسسها الاستاذ ميشال الاسمر رحمة الله عليه، هذا الانسان العظيم الفهمان المضحي حقيقة اشتغلوا سوا وكانوا مجموعة مسيحية وشيعة وسنة ودروز يعني في شخصيات موجودين بدون ما نذكر اسماءهم حتى ما اقصر مع حدا ممكن انسى حدا، وفي منهم كمان توفوا رحمة الله عليهم، لهم فضل اشتغلوا بالندوة اللبنانية وكان عندهم لقاء اسبوعي. لقاء اسبوعي بيلتقوا بيدرسوا وضع البلد ومشكلات البلد. مثلًا لما يصير في مظاهرات كتير يهتموا؛ اذا كانوا العمال عاملين مظاهرات ليش؟ شو نواقصهم؟ شو احتياجاتهم؟ اذا كانوا الطلاب كذلك الامر عاملين مظاهرات، او كانوا معلمين. يعني كان همهم يوجههم اكيد ويتابعوا...

نسرين نجم: متابعة الاوضاع المعيشية والحياتية..
السيدة رباب الصدر: المتطلبات.. فهذا الامر كفى كفى كفى الى ان وصل بقرار بتأسيس حركة المحرومين. حركة المحرومين كتبوها الوثيقة 82 شخصية من جميع الطوائف اللبنانية وقّعوها. بتعرفي انه الوثيقة الاساسية الآن موجودة، الآن موجودة ومحفوظة والتواقيع اللي بتشوفي عليهم خط ايديهم موجودة يعني حركة المحرومين ما انعملت للشيعة لحالهم. انعملت لكل محروم في لبنان..

نسرين نجم: دون اي ذكر اي طائفة او اي منطقة..
السيدة رباب الصدر:  ابدًا ابدًا.. اي محروم بدو يلحقه هذه الامتيازات اللي بهالحركة موجودة. فأثناء هذه السنوات التي كانوا يشتغلوا مع الاسف بلّشت الحرب اللبنانية. لما بلشت الحرب اللبنانية كتير كان واضح انه في اهمال على الجنوب واسرائيل على مدى كم متر بيننا وبينها.

نسرين نجم: مسافة قريبة..
السيدة رباب الصدر:  فكان مضطر الامام الى ان يؤسس الجناح العسكري بحركة المحرومين اللي هم افواج المقاومة اللبنانية "امل". ففعلًا اسّس وكانوا الشباب حاضرين بكل جدارة بكل اخلاص. كانوا ببيروت اذا مطلوب يكونوا موجودين، واذا بالجنوب... كانوا موجودين.

نسرين نجم: نعم
السيدة رباب الصدر:  طبعًا كان في هناك نشاطات..

نسرين نجم: كذلك كان في هنالك هيئة نصرة الجنوب..
السيدة رباب الصدر: احسنتِ! هيئة نصرة الجنوب كانوا مجموعة من رجال الدين الطوائف... اسسوها حتى يهتموا بالجنوب وباحتياجات الجنوب. وفعلًا كانوا فعالين. في ما بعرف من هذه المجموعة يمكن بعد في واحد اتنين احياء كمان هني توفوا. يعني كان يشرك جميع اللبنانيين بأعمال التي كان يقوم فيها للبنان، وما كان يفرّق وما كان يميز. منشان هيك هو دخل قلوب الجميع، ولحد اليوم بعده موجود بقلوب الجميع ويحكوا فيه. انا اذا بدي خبّرك شو عمل بدي احكي كتير يعني المجلس الاسلامي الشيعي الاعلى طلب انه يصير في مشاركة مع المجلس الاسلامي عند اخواننا السنة ربما ما بعرف ما كان في تجاوب، فاضطر انه يعمل المجلس الاسلامي الشيعي الاعلى..

نسرين نجم: يعني ظل لآخر لحظات حتى تم انشاء المجلس الاسلامي الشيعي الاعلى!
السيدة رباب الصدر: ابدًا، ابدًا.

نسرين نجم: نعم. حتى كان وقع انشاء المجلس شكل دهشة واستغراب عند بقية الطوائف، واثار حملة من الشائعات ضد سماحة الامام. يعني هيدي حملة الشائعات وحتى الاغتيالات كان تعرض سماحة الامام للعديد من محاولات الاغتيالات يعني كعائلة سماحة الامام وحضرتك الاخت القريبة منه دائمًا كيف كان وجدتم صدى هذا الامر حملة الشائعات على شخصية سماحة الامام؟ هل اثرت عليه شخصيًا؟ وكيف تعاملتم معه ايضًا؟
السيدة رباب الصدر: هو السيد شخصيًا ما اثرت عليه ابدًا. كل ما هنالك انه اخذ احتياطاته يعني كتير متواضع. يعني احتياطاته كيف آخدها مثلًا معه مرافق بالسيارة وشوفير بيسوق وسيارة تانية وراه. هذا هو مش اكتر. وهيدي ما منعته انه يروح على المناسبات اللي بدو يروحها او بدو يحضر مهرجانات محاضرات.

نسرين نجم: يقوم بواجباته.
السيدة رباب الصدر:  ابدًا ابدًا. ما منعته انه يمنعه عن انتقاله من منطقة الى منطقة بس بالنسبة لنا انا بقلك كان في خوف... يعني زوجته – اولاده كانوا صغار مش منتبهين- كانت دائمًا في حالة قلق. انا بقلك انا كتير كنت قلقة، يعني قضيت سنين احيانًا كتير شوف منامات، احيانًا كتير اسمع هيك خبرية... بالنهاية سلمنا امرنا لله، لأنه صاحب الرسالة بدو يكفي وبدو يتوقع كل شي، لأنه هو ما عم يعمل شي خاص، هو عم يعمل الرسالة الانسانية والرسالة الاسلامية، ومفروض يكفي. وبدو يتوقع كل شي كمان، لأنه يمكن الآخرين ما بيناسبهم هذا الطريق الحق، واللي بدو يرفع الظلم عن المظلومين واللي بدو يصحح الاخطاء، ما بيناسبهم اكيد.

نسرين نجم: ولهذا غُيب.
السيدة رباب الصدر: طبعًا طبعًا.

نسرين نجم: ولهذا لأجل اخفاء صوت الحق، ولكن بإذن الله سيظل صوت الحق يعلو على كل ظالم. كان هنالك كمان حضرتك ذكرتِ خلال حديثك انه هنالك الى جانب علاقة القرابة مع سماحة الشهيد السيد محمد باقر الصدر علاقة صداقة تربطه بسماحة الامام. هل هنالك من ذكريات تجمع الرجلين يمكن ان تخبرينا اياها؟
السيدة رباب الصدر: نعم كانوا يجتمعوا دائمًا قبل ما يصير في العراق الوضع الساسي لأنه بتعرفي لما جاء حسن البكر بلش النظام تغير. ومن بعدها جاء صدام حسين وخلص صار في اجواء كلها ظلم وارهاب. قبل هالفترة كانوا يلتقوا، والسيد كتير كان يروح على العراق اكيد زيارة العتبات المقدسة وبعدين يلتقى... وكتير كان عندهم نقاشات وابحاث وخلوة، ويقعدوا يتحدثوا في كتير من الامور.

نسرين نجم: نعم. يعني كان هناك دائمًا هذا التواصل ولم يقتصر...
السيدة رباب الصدر: تواصل وتشاور.

نسرين نجم: على شيء معين.
السيدة رباب الصدر: انا سامعة مرات انه الخطوات اللي كان يقوم فيها يحكيها مع السيد محمد باقر الصدر، انه عنا برنامج بدنا نعمل هيك بدنا نساوي هيك، بدنا كذا نمشي.

نسرين نجم: الى جانب ايضًا علاقة الصداقة اللي كانت تربطه بسماحة الشهيد محمد باقر الصدر وضمن العلاقات الاخوية المميزة التي ارتبط اسمها مع اسم سماحته الدكتور مصطفى شمران. كيف تلاقى هذين الرجلين؟ وهل هنالك جوانب غير معلنة في شخصية هذين الكبيرين يمكن ان تخبرينا عنها؟
السيدة رباب الصدر: الدكتور شمران رحمة الله عليه كان شخصية مميزة، مميزة فعلًا. الواحد شو بدو يعبر حتى يحكي عن حقيقته. الدكتور شمران كان بأميركا بيدرس، تزوج هو هونيك اميركية، وسكن بأميركا. لما خلصت دراسته، السيد دعاه يجي على لبنان. استلم ادارة مؤسسة جبل عامل... لحد هلق موجودة بعدها...

نسرين نجم: مهنية برج الشمالي.
السيدة رباب الصدر: مهنية برج الشمالي. كان فيها وما زال مهنية فترة المتوسط والثانوي، والآن صار فيها الابتدائي، فكان هو مدير هونيك. واقعًا، الدكتور مصطفى شمران كان اكبر من ان يكون بس مدير مدرسة. كان رجل مناضل، مجاهد، مربي، معلم، محب، صوفي... الحقيقة شو بدي قول عنه عن جد قليل. وكان مش بيحبه بس للامام الصدر، كان بيعشقه بيعشقه للسيد موسى، بيشتغل. الدكتور شمران كتير اله دور بحركة امل...

نسرين نجم: بالطبع.
السيدة رباب الصدر: كتير اله دور بقادة شباب تخرجوا قادة من حركة امل. كلهم كانوا على تواصل مع الدكتور شمران وكلهم هونيك درسوا، وكلهم تدربوا وكانوا كتير بيحبوه، وهيدا الحب كان يعطيهم حافز اكتر لأن يكونوا مميزين...

نسرين نجم: للعطاء.
السيدة رباب الصدر: مميزين بالعطاء. فعلًا هالعلاقة المميزة اشتغل سنوات وبقي هو بقي اشتغل حتى بعد غياب السيد. كان لما السيد في 31 آب غُيب كان بنيسان انتصرت الثورة...

نسرين نجم: الاسلامية.
السيدة رباب الصدر: او شباط عفوًا.

نسرين نجم: شباط.
السيدة رباب الصدر: بشباط انتصرت الثورة، راحوا وفد من لبنان على ايران راح الدكتور شمران معاهم وبقي بإيران وما رجع. بس بعد اسمه وذكرياته وحضوره بعدها موجودة.

نسرين نجم: موجودة فينا وايضًا لا تزال هذه البصمات التي تركها في تاريخ المقاومة ايضًا، واللي خرّج مثل ما حضرتك ذكرتِ العديد من الابطال والقادة المقاومين. لو طلبنا منكِ هيك ان تحددي لنا بعض الاماكن او ماذا تعني هذه الاماكن لسماحة الامام الصدر، يعني اذا اردنا ان نذكر مثلًا كيفون، شو كانت بتعنيه لسماحة الامام؟
السيدة رباب الصدر: شوفي السيد انا بالاول بدي قلك انه السيد باللغة اللي بيسموها اليوم "الرومانسي" يعني كتير بيعجبه الطبيعة الجميلة، المنظر الحلو، الجو الحلو... فكيفون كتير حلوة. كان يحب جباع كمان، مش بس كيفون وكان يطلع على جباع في قهوة اسمها "قبيه"...

نسرين نجم: "قبيه" لا تزال حتى الآن.
السيدة رباب الصدر: بعدها موجودة بس مغيرة المعالم لأنه خربت من بعد الاجتياحات غيروا لها معالمها. فالمنظر الجميل كتير كان يأثر بنفسه. ففي صديق النا بكيفون وهو ونس، كمان سيد ومعمم ويحبه كتير للسيد ودائمًا يعزمه وبيته صاير على التلة مرتفع، البرندا عندهم يقعدوا ويحط الاركيلة ويجتمعوا هالاصحاب. يعني كل اللي بدن يشوفوه يروحوا يلتقوا ببيت السيد الكشميري هو الصديق، رحمة الله عليه السيد الكشميري، فكانوا يروحوا لهونيك. فعلًا مرات بتشوفي بآخر الليل خالص من مهماته تعبان، يطلع على كيفون ويعمر القعدة للصبح ويتجمعوا حواليه. فهو من محبي المناظر الجميلة والمناخ الحلو. وسبحان الخالق يعني لما بيطلع بالمنظر الجميل يسبح بحمد ربه ويذكر ربه، وينبهنا نحنا شوفوا هيدا الحلو، شوفوا هيدا كيف وهيدا كيف. يعني متل اللي عم بينبه شوفوا النعم حواليكم، لا تنسوا هالنعم اللي الله عاطينا.

نسرين نجم: يعني حتى يظل الواحد عم ينبّه للصلة مع ربه. ايضًا اذا اردنا الانتقال الى صور شو كانت تعنيه له مدينة صور لسماحة الامام؟
السيدة رباب الصدر: شوفي صور بالاساس مميزة، اذا بدنا نعتبر الآية القرآنية التي انا ناسية بسورة الاسراء موجودة انه يعني بتقول المنطقة المباركة حول المسجد الاقصى الذي باركنا حوله. "حوله" ممكن توصل لصور واكتر، يعني هالمنطقة يقال بأنها مباركة، ويقال بأنه ما حدا بيقدر يعمل لها شي، يعني ولو انه انئذت كتير...

نسرين نجم: وصار في عليها حروب كتير.
السيدة رباب الصدر:  حروب... بس انحفظت يعني زمطت، الله حماها وما خلى يبقوا الكفار فيها. هو في الاساس هالتوجه عنده يعني هالفكرة انه هالمنطقة منطقة مباركة اولًا. تانيًا فينا نعتبرها عاصمة الجنوب. يعني في 62 قرية بمنطقة صور و بنت جبيل هول كلهم سكان هول كلهم ناس مين هالناس الناس الفقراء، الناس المساكين. انتِ لا تنسي انه بالستينات كتير كانت الحياة مختلفة عن اليوم. اليوم صارت صور عامرة، الحمد لله القرى الجنوبية صار فيها بيوت وفلل، المهاجرين اللي راحوا على افريقيا، وعلى مهجر اميركا، والبلاد العربية عمروها واهتموا بأهاليهم. اليوم تقريبًا كل قرية فيها جامع، فيها مسجد، فيها مستوصف. يعني هون انا بدي مرِق وقول من توجه ونهج الامام الصدر نحنا اليوم ماشيين بكل الجنوب النا حضور بالخدمات، وبالخدمات الصحية او الاجتماعية او التعليمية.

نسرين نجم: التربوية.
السيدة رباب الصدر:  فالسيد اختار صور ليكون جانب هذه المنطقة الفقيرة المظلومة. بس ما كان يقعد فيها على طول. على طول متنقل، على طول رايح وجايي، وبيروح لهالمنطقة ولهالمنطقة. ويجيب الناس لعنده، مثلًا تشوفي المناسبات الكبيرة يعملها بصور يجوا ناس، يجيب الشعراء، يجوا الادباء. مثلًا مناسبات دينية، اعياد، ولادات الائمة، وفاة الائمة. كل هذه يحييها ويجيب الناس عليها... صور كانت هيك مزدهرة.

نسرين نجم: منتدى ثقافي.
السيدة رباب الصدر: منتدى... ايوه.

نسرين نجم: طيب بعلبك.. يعني مهرجان القسم ببعلبك.
السيدة رباب الصدر: بعلبك قولي هيدي مدينة الشمس يعني هاي غير شكل، بدو يكون الها بالاساس اهمية. ولا تنسي كمان انه اهل بعلبك والبقاع بالذات كان في علاقة مميزة مع السيد. يعني انا بقلك انه الحب اللي بيحبوه لحد الآن، لحد الآن موجود. هذا اكيد بدو يخلي السيد انه يكون اله اهتمام خاص ببعلبك. اذا بتتذكري مثلًا مهرجان القسم، اول مهرجان عمله ببعلبك.

نسرين نجم: ببعلبك.
السيدة رباب الصدر: هاي معناها انه في اهتمام خاص، اهتمام خاص معناها يعني في اهلية يعني مميزة، يعني ناسها مقدرين ومتجاوبين...

نسرين نجم: ناس محبين.
السيدة رباب الصدر: محبين بيمشوا. فبالتالي كتير كان بيركز على البقاع، على الجنوب، ما نسي الشمال ابدًا. انتِ عارفة انه في قرى شيعية كشفها هو بالشمال مش تعصبًا، بس هو كان في حالة التفتيش الدائم والزيارات الدائمة. بالشمال يروح لعند اخواننا المسيحية واخواننا السنة، من خلال زياراته كشف انه في هالقرية وفي هالقرية وهدول في ناس وهدول الناس كذا...

نسرين نجم: وقدر انه يتواصل معهم وحتى يزورهم ويقدم العديد من الخدمات في تلك المناطق.
السيدة رباب الصدر: بالضبط، تواصل معهم وهني صاروا يجوا على بيروت، وهني صار في تواصل بينهم وبين الآخرين صار خدمات لهم صار في امكانات، كتير عمل هالحركة.

نسرين نجم: نعم. يعني استطاع سماحة الامام انه 10452 كلم انه تكون عنده دائمًا بدون اي تفرقة مسافة واحدة، يعني جعل 10452 بيته.
السيدة رباب الصدر: كان يطلع بالسيارة الصبح، يطلع من صور ما بتعرفي آخر الليل من وين راجع هو... راجع من الشمال، ولا من الجبل، ولا من البقاع صدقًا هذا اللي انا عم اقوله. انه بارم بارم الدنيا... في مرة من المرات كان عم بيحاضر وعم بيقول عتاب للدولة انه انتم ما عم تعطوا الحقوق للطائفة. عم بيقول لهم انا بهالفترة شو عملت... كان عم بيقول لهم انا سيارتي ماشية هالقد كلم – انا هلق ما بتذكر- انا خلال فترة قصيرة انا بارم هدول البلاد هدول القرى، انا خلال فترة قصيرة عامل كذا وكذا وكذا. يعني فعلًا كان ما بيهدى ما شاء الله، ما بيهدى ابدًا.

نسرين نجم: يعني يمكن حتى كان رئيس الحكومة او رئيس الجمهورية او رئيس مجلس النواب ما بتصور كان عندهم هيدا الاطلاع بالمناطق اللبنانية كما كان لدى سماحة الامام. اذا اردنا كمان التحدث عن مهنية برج الشمالي شو بتخبرينا عن المهنية؟
السيدة رباب الصدر: المهنية اول مؤسسة بهالضخامة وبهالمستوى من العلم والجدارة تأسست بالجنوب، صدقًا يعني مش مبالغة. لما عمّر المهنية، في رحمة الله الاستاذ منير عرب قدم الارض برج الشمالي، والمهاجرين الله يوفقهم ساهموا وعمروها. وطبعًا كان الاتفاق مع الفرنسيين ومع الايطاليين اجوا ودربوا واشتغلوا. كانت اول مؤسسة مهنية في الجنوب، ما كان في حدا غيرها، وتخرجوا منها ناس كتير مهمين وسافروا وعملوا اختصاصات. في سفرة رحنا على ايطاليا انا وزوجي ومجموعة من المهنية رحنا عملنا دورات اختصاصية ورجعنا... منح دراسية كانوا اعطونا...

نسرين نجم: انطلاقًا من مهنية برج الشمالي
السيدة رباب الصدر: من... نعم.

نسرين نجم: يعني كانت هي معقل للمقاومة ومعقل للعلم ايضًا.
السيدة رباب الصدر: للعلم وبعدها، ما زالت.

نسرين نجم: بالطبع، بالطبع.
السيدة رباب الصدر: وما زالت.

نسرين نجم: بالطبع. طيب الكنيسة الامَ كانت ترمز عند سماحة الامام ولاسيما عندما كان يتوجه الى الاديرة والكنيسة، يمكن الكنيسة الكبوشية لم تكن هي اول مرة بيطل فيها على اللبنانيين جميعًا؟
السيدة رباب الصدر: طبعًا، الكنائس من بيوت الله، لا شك مثل الجوامع. وافضل مكان لخطاب الناس ولوعي الناس هو في بيوت الله، فكان السيد فعلًا متبع هيدا الاسلوب. ذكرتِ الآن كنيسة الكبوشية بتعرفي لما خطب بالكنيسة الكبوشية كان ايام الصوم عند اخواننا المسيحية، وحكى بالصيام عند اخواننا المسيحية، محاضرته موجودة، لو عارفة بدك تسأليني كنت جبتها معي لحتى قلك فقرات...

نسرين نجم: عن السيد المسيح عليه السلام.
السيدة رباب الصدر: فقرات راقية، بيحكي عن السيد المسيح، بيحكي عن الانبياء، وبيحكي عن المرسلين، بيحكي عن اولياء الله، وبيحكي عن الصيام، بيحكي عن النفس الطاهرة، كيف ممكن الانسان يطهر نفسه بالعبادات، شو آثار الصيام على الانسان، شي بديع، كتير كان حلو. تقريبًا بقدر قلك معظم زياراته على القرى المسيحية كان اللقاء في الكنيسة، وكانوا يدقوا له الناقوس، يدقوا له الناقوس لما يجي مثل ما هني عندهم العبادة. فلما يدقوا الناقوس كل البلد تعرف انه في حادثة مهمة يجوا كلهم على الكنيسة، ويحضروا ويجتمعوا ويشاركوا.

نسرين نجم: نعم. طيب حضرتك كنا عم نحكي انه سماحة الامام كان يبرم لبنان يمكن بنهار واحد، طيب كيف كانت علاقة الامام الصدر بزوجته واولاده، هو اللي كان كثير المشاغل واللي كان يغيب عنهم باستمرار؟
السيدة رباب الصدر: والله سؤال كتير وجيه ومعك حق. هو رغم هالمهمات المتعبة اللي كانت على عاتقه واللي هو عم بيقوم فيها، علاقته كانت مميزة بزوجته وبأولاده، بس لا بد انه بدو يقصر معهم... بدو يقصر معهم عاطفيًا، مش يقصر معهم لا سمح الله بأي شي تاني. يعني كان يرعى... هو عنده صدري وحميد هدول اول، حوراء ومليحة التانيين، فكان بيرعى تمامًا اولاده بأوقات اللي هو موجود بالبيت. بس لا بد يكون في تقصير معهم عاطفيًا، لا بد. يعني شخص مثله عنده هالرسالة بدو يجمع بين الرسالة الانسانية وبين عيلته، فأكيد بدو يعطي لكل واحد شوي، وهالشوي بدو يكون يقصر... زوجته يعني بحييها انا كانت متعاونة وتحملت والله يشفيها... يعني...

نسرين نجم: ان شاء الله.
السيدة رباب الصدر: ان شاء الله. بعد غياب السيد كتير يعني...

نسرين نجم: عانت.
السيدة رباب الصدر: ايه، ايه عانت و... الله يقويها.

نسرين نجم: يعني نحنا كمان منوجه هون تحية للسيدة وايضًا كمان لأبناء سماحة الامام الصدر يللي فعلًا هني هؤلاء الجنود اللي دائمًا عم بيسعوا لإن شاء الله تضلها قضية سماحة الامام الصدر الى جانب العديد من اخوانهم حية. نحنا من فترة عم نعيش ونشاهد ست رباب المجازر يللي ارتكبت بحق اخوتنا في غزة، ولسماحة الامام كان ايضًا مش بس فقط الهم اللبناني كان ايضًا يهتم بالقضايا العربية ولا سيما فلسطين. برأيك ألم يعطِ للمقاومة وللعمل الفدائي بعدًا جديدًا من خلال لقاءاته الدائمة مع المقاومين؟
السيدة رباب الصدر: بلى، تمامًا. انا بحب قلك الشيء اللي صار بـ 2006 بلبنان، هالمقاومة وهالدفاع هيدا نهج الامام الصدر وهني قالوها. وهذا النهج يللي جعل الحمد لله منتصرين، وحط حدود لإسرائيل لأنه هي كانت يوميًا جاية عبالها يلا يلا تضرب وما سائلة. بس من بعد 2006 صار في حدود، ومن قبلها كمان بـ2000 لما انسحبوا يعني مش على خاطرهم متل ما بدن. بس بـ2006 جربوا بدن يفوتوا لحتى يشوفوا شو بدو يصير، فشافوا واخذوا درس. هيدي التجربة، هيدي انتقلت لإخواننا في غزة. يعني اذا اليوم منطلع منلاقي واقعيًا امكانات اخواننا بغزة، كان اقل من المقاومة بلبنان. يعني نحنا كنا بلبنان الكل حاضنينا يعني اهالي المقاومين، عائلات المقاومين كانوا برا منطقة القتال، وكانوا موفر لنا الحمد لله كل شي. يعني اللبنانيين الآخرين حضنونا اخواننا المسيحية لما رحنا لعندهم كلهم كانوا متعاونين، اللي كانوا موجودين في منطقة القتال هني المقاومين. بس اخواننا بغزة كانوا كلهم موجودين يعني العيلة والمرأة والاطفال والمقاوم، الى جانب انه صار لهم مدة طويلة محاصرين اكل ما في، شرب ما في، حياة ما في. انا برأيي اكيد هالنهج انتقل لهم وكانوا بجودة هني نفذوه فعلًا، ومنشان هيك منعتبرهم كلنا انهم منتصرين. يعني انتصار مميز...

نسرين نجم: يعني هيدا الانتصار يللي تم تحقيقه بـ 2006 ما هو الا البذور الاولى يللي زرعها سماحة الامام بإنشاء افواج المقاومة وبأيضًا بمجتمع المقاومة وثقافة المقاومة. ضمن الافكار التغييرية يللي حملها الفكر المؤسساتي والذي تولد عنه مؤسسات الامام الصدر يللي كانت فعلًا ولا تزال وبشهادة الجميع من المؤسسات النوعية والمتفوقة بنشاطاتها وتنظيماتها وادارتها ورئاستها اين تكمن قوة هذه المؤسسات؟ وما الهدف الذي كان من وراء انشائها في صور؟
السيدة رباب الصدر: اختي العزيزة، مثل ما قلتُ انه انطلاقة السيد كانت من صور، وقلنا انه صور عاصمة الجنوب المظلوم المحروم، فأكيد بدو يعطي اهتمامه لصور. فكمان من هذا المنهاج، ومن هذا التوجه كمان نحنا مشينا. يعني المؤسسة اللي الآن موجودة بصور للبنات، هيدي بعد غياب الامام نحنا عملناها. اذا بتتذكري كان في بخلدة مدينة الزهراء...

نسرين نجم: مدينة الزهراء.
السيدة رباب الصدر: كنا كلنا موجودين هونيك، باجتياح 82 تدمرت وما كان في مجال بعد يشتغل الواحد، فشو بدنا نعمل؟ يعني ما في مجال الا بدنا نكفي، هيدي رسالتنا. جينا على صور، وهون انا بدي احيي معالي الوزير الاستاذ جوزف الهاشم، بفضله هو وبهمته، صار في اتفاقية بين الجمعية وبين الدولة وهبونا ارض، بس حطوا لنا شرطين انه هيدي ارض الدولة انتم بتستعملوها للصالح العام، وبتستعملوها بسرعة مش انه بتتركوا الارض وهيك وبتزتوها، او تجوا تعملوا عليها بيوت وشقق هيدي للصالح العام. ونحنا فعلًا عملنا هذا الامر يعني هيدا كان مساهمة كبيرة بانطلاقة العمل والمهاجرين الله يوفقهم والخيرين حتى بلبنان. انا بحب مرِق لك اختي العزيزة ناس متبرعين يمكن من فقراء المجتمع، بس من قلبهم ومن ربهم بيدفعوا يعني بيدفعوا شوي، هالشوي بصير كتير، بيتجمع شوي شوي. عملنا تخطيط بعد الاجتياح الاسرائيلي 82، بالاول قعدنا ببرج الشمالي مع الشباب بالمهنية...

نسرين نجم: نعم. بالمهنية...
السيدة رباب الصدر: بمهنية جبل عامل. كمان اذا بتتذكري وقت الشهيد قصير اللي عمل العملية، فاتوا لجوا فاتوا علينا دمروا وخربوا وصار شي كتير على مهنية جبل عامل وعلينا. رجعنا على هذه الارض عملنا مباني وعملناها ضد الرصاص... شو بدنا نعمل كل ما منعمر كل ما بيصير في علينا هجوم. هالمرة عملنا... يعني بس اكيد بحرب 2006 ما كان ينفع، يعني كل شي تدمر ما ممكن انه يأثر...

نسرين نجم: يمكن الحيطان تدمرت، ولكن الروح والارادة ظلت.
السيدة رباب الصدر: احسنتِ. الرسالة بعدها باقية والارادة ان شاء الله باقية.

نسرين نجم: ان شاء الله.
السيدة رباب الصدر: فهذا المجمع انعمله دراسة من الاول انه يكون مثلًا افترضي بعد 20 سنة، 25 سنة يكون مجمع كامل. وبدأنا صرنا ننفذ خطوة خطوة. انا هون بدي اقول شغلة السيد موسى كان يقول لي دائمًا رباب شغلنا بدو يكون مميز غير الآخرين نحنا اذا اشتغلنا مدرسة بدها تكون مدرستنا غير شكل، اذا اشتغلنا معهد معهدنا بدو يكون غير شكل، اذا عملنا روضات، روضاتنا بدها تكون غير شكل. هذا الصوت دائمًا بدينتي. وطبعًا انا محظوظة انه مع مجموعة كتير مخلصة ومحبة عم بشتغل، من النساء ومن الرجال. فكلهم مساهمين ومساعدين الى جانب زميلات وزملاء اللي هني موجودين بالمؤسسة، كمان لهم فضل بهالعمل المميز. بدي اشير لشغلة نحنا طول السنة اقل شي اقل شي بتمرق علينا سبعة ثمانية دورات...

نسرين نجم: رائع...
السيدة رباب الصدر: يعني دورات دائمة دائمة دائمة.

نسرين نجم: يعني ملاحقة التطور.
السيدة رباب الصدر: شوفي حديث نحنا نتبعه بالتعليم، بالتربي، بالمهن. مثلًا الآن عنا فرع جديد هيدي social work بيقولها التنشيط الاجتماعي. هذا الاختصاص بس موجود بالجامعة وباليسوعية، بعد ما حدا عمله بفترات المتوسط والثانوي. نحنا عاملينه يعني بيتخرجوا مجموعة من الفتيات كلهم عندهم الكفاءة والاهلية وقادرين. تصوري انه بكل قرية يكونوا تنتين، هاي هالقرية بتعمر، هيك منشتغل نحنا. آخدين هيك مختارين هالبنات وتشوفيهم شو حابين هالاختصاص. اولًا هول بيصيروا مرشدات، بيشتغلوا على الاطفال اليتيمات اللي عنا. تانيًا، بكل ضيعة تنتين بينوجدوا بيشتغلوا على اهل الضيعة...

نسرين نجم: الشغل بيتوسع.
السيدة رباب الصدر: يعني انتِ بتحسي خلال اربع خمس سنين بيصير في قفزة نوعية، بيصير في تقدم، بيصير في تطور. فتوصيات الامام الصدر دائمًا موجودة في قلبنا، وفي اذهاننا وفي اذاننا، وهيك منشتغل.

نسرين نجم: وان شاء الله دائمًا يا رب نحنا منأمل للمؤسسات المزيد من النجاح ومن التفوق. سؤال بيطرحه كل تلاميذ ومحبي الامام الصدر، وبكل بساطة اي كل لبنان، ونأمل نحنا انه تثلجي قلوبنا بإجابة تشفي غليل شوقنا الى سماحته ما هو مصير سماحة الامام القائد واخويه؟ وما الجديد في القضية؟
السيدة رباب الصدر: اختي العزيزة بالنسبة لقضية الامام، الله بيشهد انه نحنا من اول يوم اللي صارت هالقضية، نحنا ما فقدنا الامل ابدًا حاشا لله، لأنه هالانسان اللي مثل الامام الصدر الله بيحميه والله بيحفظه. ذكرت انا مرة وقلت في معلومات يعني احد شخصيات كبيرة قدروا، استطاعوا يحصلوا عليها انه محكوم على الامام الصدر بالسجن المؤبد مدى الحياة، ابعدوه عن نشاطه، وما بدن ياه يكون موجود. هيدي الاخبار كتير ثقة من الناس اللي قالوها، ومن بعدها كمان اجا كتير اخبار متواترة هلق بتسأليني انا ما عندي اي دليل المسه، يعني ما اخذنا منه رسالة، ما وصلتنا منه علامة، ما حدا يعني تنقول ثقة مئة بالمئة قال شافوه، وقالوا لنا... هدول ما منتهتم. كتار اجوا قالوا شافوه. بس نحنا منركز على هذه الخبرية، هذه الخبرية الشخص اللي قالها كتير منوثق فيه انه محكوم عليه بالسجن المؤبد. هلق رح يبقى القذافي على طول موجود؟ اي يوم بينقلع... الله بيشيله ان شاء الله من الارض، وبريح الناس منه، بدو يبين مصيره ومصير اخوانه اكيد. ما فقدنا الامل، انا هيدا اللي بدي اقوله، نحنا ما زلنا متأملين بالله سبحانه وتعالى انه يفرج عنه ان شاء الله.

نسرين نجم: ونحن شعب الانتظار بالنهاية.
السيدة رباب الصدر: ان شاء الله، شفتِ.

نسرين نجم: سؤال ما قبل الاخير ست رباب متى كانت آخر مرة التقيتِ بها سماحته؟ وكيف تلقيتم خبر تغييبه؟
السيدة رباب الصدر: السيد سافر من بيتي كان برمضان ونايم عندي، كنا نحنا بكيفون وهو نايم عنا بالبيت. انا رتبت له الشنطة وانا زبطت له اغراضه، والصبح نزلنا سوا على مدينة الزهراء، هونيك كان في عنده اجتماعات. ولما بدو يروح على المطار، انا كنت موجودة ومرقته من تحت القرآن، هو الله يرده بخير الشيخ محمد يعقوب اطلع فيّ قال لي شو عم تعملي؟ قلت له هيدا القرآن نحنا معودين اللي بيسافر منمرقه تحته حتى الله يرده بخير وعافية. خلال ما انا عم رتب له الشنطة، قال لي انا غايب خمسة ايام، بس ما حدا بيصدق لأنه انا لما بسافر بطوّل، ولما بطوّل بيصيروا ما بيصدقوني بس اقول لهم انه انا بدي ارجع بكير، انا بدي كون على العيد هون، وبدي ارجع بكير ام صدري مريضة وموجودة بفرنسا بطمن عنها وبرجع بيجي على لبنان. وكان آخر لقاء باجتماع عمل في مدينة الزهراء، وسافر من هونيك وودعناه.

نسرين نجم: يعني ومنأمل نحنا اللقاء القريب لحتى تتحول ايامنا كلها الى اعياد، ست رباب اذا طلبنا هيك منكِ بالختام توجيه رسالة الى محبي سماحة الامام الصدر، واذا هيك طلبنا منكِ لو كان سماحة الامام الصدر معنا شو بتوجهي له رسالة؟
السيدة رباب الصدر: بقول انه يكونوا يحبوا بعضهم، يتعاونوا مع بعض، يوثقوا ببعض، لأنه اذا تأملنا بالاوضاع الداخلية او العامة بالعالم، منلاحظ انه الوضع كتير دقيق. نحنا الآن بحاجة نجمع شملنا، نوحد كلمتنا، نوقف لحماية لبنان، نوقف لمصالحنا، لمصالح لبنان. اكيد اذا الامام الصدر موجود كان بيقول لهم هيك بيقول اجمعوا جمعة واحدة كلكم، وتعاونوا مع بعضكم، وكونوا بخدمة لبنان والله يحمي لنا لبنان.

نسرين نجم: ان شاء الله يا رب. نحنا، السيدة رباب الصدر شرف الدين، منشكر حضورك معنا، ومنشكر ايضًا هذه الذكريات وهذه الافكار التي طرحتيها في هذه الحلقة من برنامج "حكايتي مع الامام" وعلى امل ان يعود سماحة الامام القائد السيد موسى الصدر واخويه الشيخ محمد يعقوب والصحافي الاستاذ عباس بدر الدين بأقرب وقت ممكن لتكون ايامنا كلها اعياد، وبالتالي فعلًا نحس بالانتصار، ونحس انه فعلًا نحنا بلبنان وطن نهائي كما كان بيتمنى، ولا تزال هذه امنيتنا لجميع ابنائه.
السيدة رباب الصدر: ان شاء الله. شكرًا لك، وشكرًا للمستمعين، وشكرًا لإذاعة الرسالة الجميلة.

نسرين نجم: شكرًا لحضرتكِ.
مستمعينا الاحبة كنتم مع برنامج "حكايتي مع الامام" من اعداد وتقديم نسرين نجم، منفذ الفترة محمد فحص، حتى نلتقي لكم منا اسمى التحيات والسلام عليكم ورحمة الله وبركاته.